အနှိုင်းမဲ့ .. ကျေးဇူးရှင်

အနှိုင်းမဲ့ .. ကျေးဇူးရှင်


အလုပ်တွေကြားနစ်မြုပ်

ပင်ပန်းမှုပေါင်းများစွာဖြစ်နေခဲ့လည်း

ဘယ်တော့မှ မငြီးငြူ

မိသားစုအတွက်တာဝန်ယူ

လိုအပ်သမျှ အကုန်ဖြည့်ဆည်းပေးတဲ့ ဖေဖေ .. ။


အမေ့မေတ္တာ ကြီးမားသလို

ဖေဖေ စောင့်ရှောက်သမျှ

သားသမီးတို့အတွက်

တန်ဖိုးမဖြတ်နိုင်တဲ့

အနှိုင်းမဲ့ ကျေးဇူးရှင်ပါပဲ ဖေဖေ .. ။


အခက်ခဲတိုင်း မကြောက်ရွံ့

သမီးတွေအတွက် ရှေ့တန်းတင်ရင်း

ဘ၀မှာအရာအားလုံးပြည့်စုံအောင်

ဖန်တီးတည်ဆောက်ပေးခဲ့တဲ့

မေတ္တာတွေအားလုံးအတွက်

ကျေးဇူးပါပဲ ဖေဖေ .. ။


ရံဖန်ရံခါ

အားငယ်စိုးရိမ်မှုတွေဝင်တိုင်း

သတ္တိအပြည့်ရှိအောင်

အားမာန်တွေပေးခဲ့တဲ့ ဖေဖေ

အသက်ရှင်ခွင့်ရခိုက်မှာ

အမှန်တရားနှင့်မျှတမှုတွေအတွက်

ရဲရဲဝင့်ဝင့်သိရှိရင်ဆိုင်နိုင်အောင်

အမြဲသွန်သင်ပေးခဲ့တဲ့ ဖေဖေ

ဒီကျေးဇူးတွေအားလုံးအတွက်

ရင်နှင့်အမျှ ဦးခိုက်ထားလျက်ပါ ဖေဖေ .. ။


ထက်မြက်ထူးချွန်တဲ့ဖေဖေကြောင့်

မိသားစုတစ်ခုလုံး

အပူပင်မရှိ အေးချမ်းစွာ

လောကအလယ်မှာတင့်တယ်နိုင်ခဲ့တာ

ဖေဖေသွန်သင်ဆုံးမတဲ့

မာနသတ္တိတွေအားလုံး

သမီးတွေမှာ ခိုင်မြဲနေခဲ့ပါပြီ ဖေဖေ .. ။


`မတရားတာအတွက်တော့

မချမ်းသာချင်နေပါစေ

ဘာဆိုဘာမှမလုပ်မိစေနဲ့´ဆိုတဲ့

ဖေဖေစကားတစ်ခွန်းတည်းနဲ့

ဒီကနေ့ဒီအချိန်ထိ

လူတွေအားလုံးနဲ့ရင်ဆိုင်ချိန်မှာ

လိပ်ပြာသန့်စွာ ယုံကြည်ချက်တွေပိုခိုင်မာတတ်ခဲ့ပြီ ဖေဖေ .. ။


`ငါ့သမီး´ဆိုတဲ့စကားသံကိုရွေရွတ်

ဘာမဟုတ်တဲ့လုပ်နိုင်တာလေးအချို့အတွက်

အမြဲဂုဏ်ယူအားပေးနေတတ်တဲ့ဖေဖေ

အခုအချိန်မှာဆိုရင်

စိတ်အားငယ် ကြောက်လန့်စရာတွေဆိုတာ

သမီးတို့အတွက် နည်းနည်းမျှမသက်ဆိုင်

ခွန်အားသတ္တိတွေအမြဲမွေးရင်း

လောကအလယ်မှာ ကြံ့ကြံ့ခံရင်ဆိုင်တတ်ပါပြီ .. ။


`ဘ၀မှာဘာပဲလုပ်လုပ်

သူများကိုသာလိမ်လို့ရမယ်

ကိုယ့်ကိုယ်ကိုယ်လိမ်လို့မရဘူး

ကိုယ့်လိပ်ပြာကိုယ်အမြဲတမ်းသန့်စင်အောင်နေ´

ဆုံးမစကားတွေနဲ့

အလင်းရောင်ပေးခဲ့တဲ့ ဖေဖေ

အနှိုင်းမဲ့သခင်ကျေးဇူးရှင်ပါပဲ .. ။


အရွယ်ရောက်လူလားမြောက်ချိန်

ဖေဖေ့ကျေးဇူးကြွေးတွေဆပ်ဖို့

ကြိုးစားထမ်းဆောင်နေရင်း

ဘ၀ဆိုတဲ့ဇတ်ခုံကြီးပေါ်လျှောက်လှမ်းနေချိန်

ရင်ထဲကဒီကဗျာတစ်ပုဒ်နဲ့

ရိုသေစွာ ကန်တော့လိုက်ပါတယ် ဖေဖေ .. ။

လင်းလက်ကြယ်စင်